«Бюро» стала вядома, што ў жніўні 2024 года былы супрацоўнік Службы бяспекі Лукашэнкі Сяргей Чэпікаў заняў пасаду выканаўчага дырэктара ў «Белгазпрамбанку». Публічна пра гэта нідзе не паведамлялася. На сайце «Белгазпрамбанка» няма ніякіх згадак пра новага кіраўніка. Нагадаем, ужо не ўпершыню экс-ахоўнік Лукашэнкі робіцца дырэктарам буйнога банка.
Паводле інфармацыі, атрыманай ад «Кіберпартызан», Сяргей Чэпікаў працаваў у Службе бяспекі Аляксандра Лукашэнкі як мінімум з 2005 да 2021 года. У лютым 2020-га ён атрымаў узнагароду «За волю да перамогі» ў міжведамасным турніры па більярдзе за каманду СБП.
«Бюро» патэлефанавала Сяргею Чэпікаву, і ён пацвердзіў сваё прызначэнне. На пытанне, чаму менавіта ён атрымаў дырэктарскую пасаду ў «Белгазпрамбанку», Чэпікаў адказаў:
— Ну, напэўна, таму што варты.
Са словаў Чэпікава, ён не працаваў у СБП менавіта «целаахоўнікам Лукашэнкі». Але чым займаўся ў гэтай структуры, расказаць не захацеў. У Службу бяспекі Лукашэнкі Чэпікаў трапіў з беларускага войска, дзе ў тым ліку служыў у кіналагічным цэнтры. Адна з задач структуры — падрыхтоўка кадраў для аховы розных асаблівых аб’ектаў.
Гэта не першае прызначэнне былых супрацоўнікаў Службы бяспекі Лукашэнкі на кіраўнічыя пасады ў банках. Раней «Люстэрка» расказала пра галавакружную кар’еру галоўнага ахоўніка Лукашэнкі Аляксея Ляшкевіча. Яго неаднаразова бачылі ў атачэнні палітыка, у тым ліку падчас міжнародных паездак. У лютым 2024 года Ляшкевіч заняў пасаду выканаўчага дырэктара ў «Беларусбанку». Паводле крыніцы «Люстэрка», гэтая пасада была створаная спецыяльна пад Ляшкевіча, раней выканаўчага дырэктара, які курыруе пытанні бяспекі, у структуры кіраўніцтва банка не было.
Чытайце таксама
