Жыхары Мінска змогуць мяняць пустыя газавыя балоны на новыя ў спецыяльных апаратах, якія неўзабаве ўсталююць на запраўках і рынках. Пра гэта паведамілі ў прэс-службе Мінэнерга.
Праект выпуску аўтаматаў па продажы балонаў са звадкаваным газам рэалізуе прадпрыемства «Белгазтэхніка». Плануецца, што першы газамат адкрыюць у Мінску ўжо сёлета. Там можна будзе здаць пусты балон і атрымаць новы.
«Пакуль праект пілотны. Сумесна з газавікамі вытворцы плануюць дэталёва вывучыць попыт на новы від паслуг, вызначыць аптымальныя пляцоўкі для размяшчэння такіх комплексаў самаабслугоўвання. У якасці прыярытэтных разглядаюцца аўтазаправачныя станцыі, буйныя гандлёвыя аб’екты і рынкі», — расказалі ў Мінэнерга.
Такія аўтаматы будуць складацца з прыстасавання прыёму і выдачы балонаў, а таксама сістэмы аплаты. На электронным табло трэба будзе абраць патрэбны па аб’ёме балон і заплаціць банкаўскай картай. Усе камплектавальнікі і праграмнае забяспечанне будуць беларускай вытворчасці.