Брэсцкі абласны суд асудзіў 44-гадовага жыхара Іванава Аляксандра Дарагакупца на 5,5 года пазбаўлення волі і штраф на 2,1 мільёна рублёў за «наўмысныя злачынствы экстрэмісцкай скіраванасці», паведамілі ў прэс-службе Генпракуратуры.
«Ён здзейсніў шэраг наўмысных злачынстваў экстрэмісцкай скіраванасці, уключаючы пералік на банкаўскія рахункі і віртуальныя кашалькі, якія знаходзіліся ў карыстанні прадстаўнікоў экстрэмісцкіх фарміраванняў, у тым ліку ўзброеных, напрыклад, полк Каліноўскага, грашовых сродкаў і крыптавалюты ў суме не менш за 11 тысяч рублёў», — заявілі ва ўстанове.
Суд прызнаў мужчыну вінаватым у:
- дапамаганні ў наўмысных дзеяннях, скіраваных на распальванне сацыяльнай варожасці па прыкмеце іншай сацыяльнай прыналежнасці;
- уваходжанні асобы ў склад «экстрэмісцкага фарміравання» з мэтай здзяйснення злачынства «экстрэмісцкай» скіраванасці;
- перадачы грашовых сродкаў любым спосабам для заведамага забяспечання «экстрэмісцкай» дзейнасці, у тым ліку паўторна;
- спрыянні «экстрэмісцкай» дзейнасці;
- фінансаванні вярбоўкі, навучання, іншай падрыхтоўкі і выкарыстання грамадзян Рэспублікі Беларусь для ўдзелу на тэрыторыі замежнай дзяржавы ва ўзброеным фарміраванні аднаго з праціўнікаў, узброеных канфліктах і ваенных дзеяннях з адсутнасцю прыкмет найміцтва.
Па сукупнасці «злачынстваў» суд асудзіў яго на 5,5 года пазбаўлення волі ў калоніі ўзмоцненага рэжыму са штрафам у памеры 50 000 базавых велічынь (2,1 млн рублёў).
У пракуратуры таксама паведамілі, што падчас расследавання крымінальнай справы мужчына «добраахвотна пералічыў» некалькім дзяржустановам 600 тыс. даляраў.
Прысуд у законную сілу не ўступіў, можа быць абскарджаны і апратэставаны ў апеляцыйным парадку.