Беспілотны лётны апарат урэзаўся 12 сакавіка ў будынак адміністрацыі расійскага горада Белгарад. Пра гэта паведаміў губернатар рэгіёна Вячаслаў Гладкоў.
Паводле звестак чыноўніка, у выніку ўдару БПЛА пацярпелі два чалавекі: адна жанчына атрымала аскепкавыя раненні, другая — кантузію.
«Пацярпелым аказваецца ўся неабходная медыцынская дапамога. У выніку выбуху ў будынку выбітыя вокны, пасечаны фасад. На месцы працуюць усе аператыўныя службы», — удакладніў Гладкоў.
Нагадаем, у ноч на 12 сакавіка ўлады адразу сямі расійскіх рэгіёнаў паведамілі пра ўдары беспілотных лётных апаратаў. Губернатары Арлоўскай і Ніжагародскай абласцей пацвердзілі, што ў выніку трапляння дронаў пачаліся пажары на размешчаных там прадпрыемствах паліўна-энергетычнага комплексу.