Расія аштрафавала Google на суму з 36 нулямі за забарону пракрамлёўскіх каналаў на YouTube. Памер штрафу перавышае сусветны ВУП за 2023 год, паведамляе Euronews.
Кампанія Google, аштрафаваная ў Расіі за выдаленне расійскіх тэлеканалаў з YouTubе, на сённяшні дзень павінная выплаціць рэкордную суму на два ундэцыльёны расійскіх рублёў (ундэцыльён — адзінка з 36 нулямі).
Такая гіганцкая няўстойка (а яна перавышае ВУП свету за ўвесь 2023 год!) разлічаная па выніках чатырохгадовага разбіральніцтва, да таго ж сума штрафу падвойваецца кожны тыдзень да выканання карпарацыяй патрабаванняў расійскага боку. Першыя прэтэнзіі да тэхналагічнага гіганта былі сфармуляваныя ў 2020 годзе; тады ў суд звярнуліся «Царград» і РІА ФАН, чые ўладальнікі знаходзяцца пад санкцыямі ЗША з 2014 года. Усяго пазовы супраць Google падалі 17 пракрамлёўскіх рэсурсаў, большасць была заблакаваная ў YouTubе з пачаткам поўнамаштабнага ўварвання Расіі ва Украіну зімой 2022 года.
Раман Янкоўскі з расійскага Інстытута адукацыі ВШЭ заявіў у размове з агенцтвам ТАСС, што Google «відавочна не будзе плаціць штраф, а Расійская Федэрацыя не зможа спагнаць гэтыя грошы з кампаніі».
Разлікі паказваюць, што ён мае рацыю. Рынкавая капіталізацыя холдынгавай кампаніі Google, Alphabet, складае крыху больш за два трыльёны даляраў. Нават з улікам прыбытку ў памеры 80,54 мільярда даляраў (73,96 мільярда еўра) за апошні квартал, тэхналагічны гігант проста не зможа дазволіць сабе выплаціць такую няўстойку. Да таго ж любыя прэтэнзіі расійскага ўрада могуць быць абгрунтаваныя толькі ўнутры краіны.