У Кобрыне 12-гадовы падлетак падбіў маці схадзіць на прагулку да збанкрутаванага прадпрыемства, а заадно скрасці маёмасць, якая засталася ўнутры. Цяпер на жанчыну завялі крымінальную справу, ёй пагражае яшчэ адна, паведамілі ў міліцыі.
Мінулай восенню хлопчык і яго прыяцель гулялі непадалёк ад прадпрыемства, якое ўжо не працуе і праходзіць працэдуру ліквідацыі ў сувязі з банкруцтвам. Яны прабраліся ўсярэдзіну і скралі два камп’ютары, але ў будынку засталася і іншая маёмасць.
Праз некалькі месяцаў, у лютым, падлетак прапанаваў маці зноў туды схадзіць, пры гэтым маляўніча расказаў, чым можна разжыцца. Жанчына пагадзілася, на прагулку маці з сынам прыхапілі дзве вялікія торбы і заплечнік.
Прабраўшыся праз дзірку ў плоце на тэрыторыю прадпрыемства, яны спакавалі ў багаж электраінструмент, два факсы, будаўнічае мацаванне і іншую маёмасць агульным коштам больш чым 600 рублёў.
Гэтак жа, як і ўвайшлі, кобрынцы выйшлі з тэрыторыі з поўнымі торбамі набранай маёмасці і скіраваліся дадому. Але данесці здабычу не паспелі: іх затрымалі міліцыянты, якія рабілі паблізу абыход.
У дачыненні да жанчыны распачалі крымінальную справу за крадзеж, яе таксама пакаралі па адміністрацыйным артыкуле за невыкананне абавязкаў па выхаванні дзяцей. Разглядаецца пытанне пра прыцягненне яе да крымінальнай адказнасці за ўцягванне няпоўнагадовага ў антыграмадскія паводзіны.
Адзначым, само дзіця не пакараюць: у Беларусі крымінальная адказнасць пачынаецца з 14 гадоў па асобных артыкулах і з 16 гадоў — па большасці злачынстваў.