Амерыканскае выданне Atlantic апублікавала яшчэ адзін артыкул са скрыншотамі паведамленняў з чата амерыканскіх чыноўнікаў у мэсэнджары Signal, піша Руская служба Бі-бі-сі.
На новых скрыншотах можна, у прыватнасці, убачыць паведамленне ад міністра абароны ЗША Піта Хегсэта раніцай 15 сакавіка (за 31 хвіліну да таго, як амерыканскія вайсковыя самалёты падняліся ў паветра), якое ўключае падрабязнае апісанне таго, у які менавіта час і якія атакі (знішчальнікі F-18, дроны і ракеты «Тамагаўк») запланаваныя па пазіцыях хусітаў у Емене.
Як адзначаецца ў артыкуле, Atlantic «як правіла», не публікуе інфармацыі пра амерыканскія ваенныя аперацыі, каб не паставіць пад пагрозу амерыканскіх вайскоўцаў, таму ў папярэдняй публікацыі расказвалася «пра характар перадаванай інфармацыі, а не канкрэтныя падрабязнасці пра атакі».
«[Аднак] заявы Хегсэта, [кіраўніка Нацыянальнай разведкі Талсі] Габард, [дырэктара ЦРУ Джона] Рэткліфа і Трампа ў спалучэнні са сцверджаннямі шматлікіх чыноўнікаў адміністрацыі пра тое, што мы хлусім пра змест паведамленняў у Signal, пераканалі нас у тым, што людзі павінныя пазнаёміцца з тэкстамі, каб прыйсці да ўласных высноваў», — растлумачылі журналісты.
Пасля таго як прэзідэнт ЗША Дональд Трамп заявіў, што інфармацыя ў чаце не была сакрэтнай, у Atlantic вырашылі ўдакладніць у Белага дома, ці не маюць чыноўнікі пярэчанняў супраць публікацыі поўнай перапіскі.
Прэс-сакратарка Белага дома Кэралайн Левіт адказала, што ў чаце не было сакрэтнай інфармацыі, але «гэта не значыць, што мы ўхваляем публікацыю размовы». Яна дадала, што адміністрацыя прэзідэнта супраць публікацыі, бо ў чаце абмяркоўвалася «адчувальная інфармацыя».
Каментуючы новую публікацыю, Левіт звярнула ўвагу на тое, што ў загалоўку новага артыкула паведамленні з чата названыя «планамі атакі», а не «ваеннымі планамі», што, на яе думку, значыць, што Atlantic «здаўся» і прызнаў сваю памылку (першы артыкул называўся «Адміністрацыя Трампа выпадкова даслала мне паведамленні пра свае ваенныя планы»).
«Уся гэтая гісторыя была чарговай містыфікацыяй, прыдуманай ненавіснікам Трампа, які добра вядомы сваімі сенсацыйнымі заявамі», — заявіла Левіт.
Дональд Трамп, адказваючы на пытанне пра новую публікацыю Atlantic, зноў «перайшоў на асобы»: публікацыі пра чат ён назваў паляваннем на ведзьмаў, само выданне — «правальным часопісам», а асабіста Джэфры Голдберга — «абсалютна гідкім тыпам» (a total sleazebag).
У той жа час, калі журналісты спыталі яго, хто вінаваты ў тым, што іх калегу ўключылі ў сакрэтны чат, Трамп назваў імя свайго дарадцы па нацыянальнай бяспецы.
«Майк Уолтц, я так разумею, узяў на сябе адказнасць. Мне сказалі, што гэта Майк», — сказаў прэзідэнт.
Майк Уолтц сапраўды ў аўторак заявіў, што цалкам бярэ адказнасць на сябе, а іншыя ўдзельнікі чата, дзяржсакратар Марка Рубіа і кіраўнік ЦРУ Талсі Габард, назвалі ўключэнне журналіста ў чат «сур'ёзнай памылкай».
Асуджаць Піта Хегсэта, які вывесіў у чаце падрабязны графік удараў па хусітах, Трамп адмовіўся.
«Хегсэт выдатна працуе. Ён не мае да гэтага дачынення», — сказаў Трамп, дадаўшы, што наогул гэтая ўцечка праз Signal яго не турбуе.
Чат найвышэйшага ўзроўню
24 сакавіка галоўны рэдактар Atlantic Джэфры Голдберг расказаў, што яго выпадкова дадалі ў закрыты чат высокапастаўленых прадстаўнікоў адміністрацыі ЗША, у якім абмяркоўваліся дэталі аперацыі супраць хусітаў у Емене, якая пачалася 15 сакавіка.
У групавым чаце, паводле Голдберга, былі людзі з імёнамі Піт Хегсэт (міністр абароны ЗША), Марка Рубіа (дзяржсакратар), Джэй Дзі Вэнс (віцэ-прэзідэнт) і іншыя, а дадаў яго чалавек на імя Майкл Уолтц (так завуць дарадцу прэзідэнта ЗША па нацбяспецы).
У Белым доме пазней пацвердзілі сапраўднасць перапіскі ў чаце, але заявілі, што сітуацыя з уключэннем у групу старонняга чалавека не стварыла пагрозы нацыянальнай бяспецы.
Эксперты і апаненты адміністрацыі Трампа лічаць тое, што адбылося, абуральным парушэннем правілаў бяспекі і патэнцыйным парушэннем закона пра шпіянаж.
Многія палітыкі і журналісты ўспомнілі пра абвінавачанні ў адрас Хілары Клінтан, якая, калі была дзяржсакратаром, вяла працоўную перапіску са сваёй хатняй электроннай пошты з хостынгам на прыватным серверы. Адным з тых, хто актыўна патрабаваў пакараць Клінтан за гэта, быў Дональд Трамп.